Kako mslie tali mari sisi manak om, fo mnot mol ni. Mase mom mdo man manak om mdo, “Nai yrana ydo mblit yifle-fle yese yek kota. Tet sago tdo tain tali ana.” Mase manak om mefsiwain mdo, “Mbo nen nain nali kota fo nain fe sio?” Fo mom mdo oli mdo, “Mbo tet tkahri tarin tak truk kou wsimbiele ana.” Oko fo mom main msinghar truk.
Mom mhok kmo mak eri fan defit, oko fo mom msot truk mano om maka mainkat fe oko. Nde kako om mkahri lok-lok mak truk msa ago, mase mom mkahrikat mewer truk oko, mdi mak mdado ale. Nde truk oko main kafkat.
Fo manak om mdo oli mana mom mdo, “Se nen ndo nain fe sio ma nain nali kota?” Mase kako mom mdo, “Tet tke mbo tlak nggaman tak na drar ko wfe kya mkafuk nyan.” Oko fo mom mdrik mgiaman.
Tali oli fo, na drar ko wain wali kota, nde wonyewain kya om maheit fali kako om mak mbol. Fo manak om mefsi oli man mom mdo, “Mbo nen nain fe sio ma nain nali kota?” “Mbo tet dain tdrik tali karung cengkeh ra mbo nai yodik main mali kota. Nde kako om mwawan mak karung mkafuk nyan.
Mase truk oou whon kamitkat, nde wlak nggait karung ra mari kako om, wasen nggemkat mom. Fo manak om mefsiwain oli mdo, “Mbo nen nain nde kota nain fe sio ra naka?” Mase mom mdo, “Mbo tet tarin klen saras, tain tali kota.” Nde mom main msinghar klen saras.
Kako om msot fo, mom mkahri mak klen saras ou woli las, nde wou wdo whri fali mom. Eri nde foron wafleu whok rokkat, wmbakat mom mdi mali fombi adi. Klen oko wain kawak. Nde manak om mefsiwain oli mdo, “Mbo nen nain nali kota nain fe sio?”
Mom mdo, “Mbo tedain dkoin eri, tkahri kawak eri nde thok tak ana.”
Kako om mkahri, mkahri … mkahri-hri kawak nde di-di-di-di-di… mhok mak kota. Mom mjere fe kako ra wase wak kota, fo mefsiwain man wou mdo, “Mblit ra yifle yimnyek-mnak ei yek sio?
Wou wadik owo wdo, “Hee, mblit yifle yimnyek yese nggait yek kota ko. Mblit ra ywet-wat eri yese yek ko. Mblit ra yifle yimnyek yese yek eri tambra.”
Nde kako kota ou wkahrikat wali mbol wou wa, mase kako mom mal oli mali mbol mom ma mak tambra.
Fo kako om main oli mak tambra fo, mari manak om la yese yslie tali. Nde kako mom mrana man manak om mdo, “Singgo mase tet tnot dnes tdo tain tase tak wi wat fo tase rorwain nggait.
Sumber; Inilah Bahasa Kita (Cerita-cerita Menarik Dalam Bahasa Tehit Dit) Departemen Pendidikan dan Kebudayaan 2004
