PUISI BAHASA MEE : AKAA BETOKE

  • Whatsapp
Budaya Suku Mee -Doc.Papuans Photo
Budaya Suku Mee -Doc.Papuans Photo

Oleh : PUDUUWIYAI APKULOL DOU)

 

Bacaan Lainnya
banner 400x130

Enako peu, peuke ena timakai, akaa betoke.
Maako puya, puyako maa gamakai, akaabetoke.
Wegaigamanako tewegai, tewegaiga manako wegai, akabetoke. Ekowaiyadaniko tekowai, tekowaiyadaniko ekowamakai, akaabetoke. Uwii itako teuwii, teuwii itako uwimakai, akaabetoke.

Akaabetoke,
Gaiya daniko tegaamakai, tegaiyaa daniko gaamakai, akabetoke. Douya daniko tedoomakai, tedouya daniko domakai, akabetoke. Yuwiya daniko teyuwii, teyuwiya daniko yuwii, akaabetoke. Tenaya daniko nomakai, naiya daniko tenomakai , akaabetoke.

Akaabetoke, Daa danidoko piyo piyoo, piyo danidoko dada, akaabetoke. Ugatameki daba miyo yaikai, tegekii ibo wadoyaikai, akabetoke. Meeko megee dota, megeko mee dota, akaabetoke.
Poyaamanako yumu yimu, yimudooko yamo adaba, akabetoke. Ipa dimi manako poto awii, emoge dimi manako kapaa awii, akaabetoke.

Akaabetokee, muniyaa agiyoko temunii, tenaiya agiyoko woowagee woono, akabetoke. Mee yokaa ke dabaa miyo yaikai, iyowoyama degema ko iboo wadoyaikai, akabetoke. Iyowoyaka agiyoko dimiutouda awii, meeka agiyoko daba miyo yaikai, akaabitoke.

Akaabetoke, Akaitai akukai ya manako badoo tagii atii, okeiya manaakamu peumanako dimiutouda awii akaabetoke.
Dakoda piyoko piyo manako yamo aadaba, uwayamee manakoo ebeidaidai pukoudaidai, akaabetoke.
Ooda owadaako matoka makiyawii, mee ko tanane kugiyaii dani tinaa, akaabetoke. Oopa owapako teumii, meeko egeidaiga umita mogoudaigaa umita akaabetoke.

Akaabetoke, Akiiyaka meeka iyeeko teepei, okeiya iyee ko aniya aniya, akabetoke. Ekowai kodeeko emuu kidaa, naii ebeeko pooda, akabetoke. Akaabetoke, akiya godooko yamo adaba, okeiya godoko aniya aniya, akaabetoke. Okeiya mudepekaako aniya aniya, akiya mude pekako gewa bawa, akaabetoke.

Akaabetoke, Okeiya agiyoko aniya aniya, akiiyaagiyoko au yakitq bou yakita, akaa betoke. Ekowaidimiko beu, mana wegaikou taniiwoyo taniiwakoyo, akabetoke. Manawegaigako akiuwii nakiuwii, bola wagidako ukiuka kotogo, akaabetoke. Gereja pako yoka yagamoudoto, politik epako yameidoto, akaabetoke.

Ayiimanako butuu woomakiyawii, mananoko ganeidaidai kipoudaidai, akaabetoke. Sembayang dimi manako odoobee tida, mogaimanako ebeida pukoudaa, akaa betokee. Kapogeiye ebatai ugai dimikiko abaguu kapaguu kida, tananee bubuma uwina yawina iyeemako pidoo padoo tidaa, akaabetoke. Owapa yimuu deiko ewo, okeiya yimuu deta owaa bugiko kibigii yagadaa, akaabetoke. Akabetoke, enaa iyeeko peu peu, peu iyeeko pidodaa, akaabetoke.

Akaabetoke, akaabetoke, akaabetoke.

Berikan Komentar Anda

Pos terkait